نهنگ قانادلي چوخ ياشلي قوجا   

قابريئل قارسييا مارکئس 

  ياغيشين اوچونجو گونونده ائوين ايچينده او قدر يئنگج (خرچنگ) اؤلدورموشدولر کي پئلايو سويلا دولموش حَيَطلريندن کئچيب اونلاري دنيزه آتمالي اولدو، چونکي يئني دوغولموش کؤرپه لري بوتون گئجه ني قيزديرما ايچينده ايدي، و  " بو عوفونتدندير "  دئيه دوشونوردولر. دونيا چرشنبه آخشاميندان بري کدرلي ايدي. گؤيله دنيز بيرجه آلاتوران شئيه چئوريلميشدي و قومو مارت گئجه لري قور-قور پارلايان ساحيل، پؤرتموش پالچيق و چوروموش صدف ساحيلينه دؤنموشدو. گون اورتا واختي، پئلايو يئنگجلري دنيزه آتيب ائوه قاييداندا هاوا او قدر توتقونويدو کي دال حيطده ترپه نيب اينيلدييه نين نه اولدوغونو سئچمک مومکون دئييلدي. اونون قوجا بير کيشي، چوخ قوجا بيريسي اولدوغونو آنجاق لاپ ياخينينا گئتديگينده سئچه بيلميشدي. اوزوقويلو پالچيغا اوزانميشدي. نه قدر چابالاييرديسا قالخا بيلميردي؛ نهنگ قانادلاري مانع اولوردو. 

  آردينی اوخویون.

 پالئوليت (Palaeolitihic) اينجه صنعتینده حرکت آييردي 

پالئوليت صنعتکارلاري، ماغارا دووارلاري اوزرينده و يا باشقا ال چاتار يئرلرده رسم ائتديگي جاناوارلارا، حيات وئرمه يه ده جهد گؤسترميشلر. حرکتده ايکن رسم ائديلميش چوخوسو اوتجول حئيوانلاردان چوخلو نومونه لر وار. بو تصويرلر عوموميتله ساده و تفصيلاتسيز، عئيني حالدا طبيعتده کي  رفتارلارين يوکسک درجه ده موشاهيده ائديلمه سينه ثوبوتدور (Azema 2004b).

  رسيملرين بعضيسي ايلک باخيشدا حرکتسيز گؤرونورلر، آنجاق همين رسيملره باشقا بوجاقلاردان ياخود دييشيک يؤنلردن ايشيقلانديريلاراق باخيليرسا، بو فيکير دييشير. ماغارا صنعتکارلاري احتيمالا ماغارا دووارلاري نين طبیعی حجملريندن، چکديکلرينين داها جانلي حيس ائتديرمه سي اوچون فايدالانميشلار. داها دوغروسو، بو صنعتکارلار حرکتلري آناليز ائديب، آرديجيل تصويرلرين اوست-اوسته (Superimposition) ياخود يان-يانا چکمه سييله، دؤردونجو اؤلچو (زامان) ايجاد ائتمگي باجارميشلار. آنجاق، تخمينن 20 مين ايل عرضينده اينکيشاف ائتميش پالئوليت اينجه صنتينده کي  مينلرجه حئيوان رسميندن چوخ آزي بو اؤزلليکلري داشيماقدادير. آشاغيدا بو تصويرلردن نئچه سئچيلميشي اوزره دانيشيلاجاق. 

  آردي اوچون آشاغيدا  "آردی "_ني باسين.

نووروز بايرامينيز موبارک!

نووروز، نووروز باهارا،

آچير نووروز باهارا.

نووروز گلير، ياز گلير.

نغمه گلير، ساز گلير.

گون چيخير ساچلي قيزلا،

اوزون ساچاقلي قيزلا.

باغچاميزدا گون اولسون،

گون گلسين، هر گون اولسون.

باغچاميزدا گول اولسون،

گول اوسته، بولبول اولسون.

نووروز گونو ياز اولار،

قيرخ کؤتوک ده آز اولار.

نووروز، نووروز باهارا،

گوللر گولر باهارا.

نووروز گلير، ياز گلير.

نغمه گلير، ساز گلير.

نووروز بايرامينيز موبارک!

حؤرمتله، انيمارال

آنيماسييا تئخنيکالاري اوزره 

  انیمیشن فيلملري چئشيدلي و سايا گلمزجه يؤندملر و تئخنيکالار ايله ايستحصال اولونور. طبیعي کي بو صنعتين تئخنولوگييايا (تکنولوژی) سيخ باغلي اولدوغونا گؤره، تئخنولوگييا ايره ليله ديکجه، تئخنيکالاري نين دا سايي آرتيب، مودئرنلشير. آنجاق بو سايا گلمز تئخنيکالاري 4 عومومي دسته يه بولمک اولار.

  الف. ايکي اؤلچولو (2D) آنيماسييا؛ (کلاسيک جيزگي فيلمي کيمی)     

  ب. 3 اؤلچولو آنيماسييا (کوکلا، گئرچک جيسملر، نسنه لر و اينسانلار ايله انیمیشن)     

 ج. کومبيناسييا (موختليف يؤندملرين بير فيلمده بيرلشمه سي؛ جانلي فيلم_انیمیشن ياخود کامپیوتر انیمیشن_جيزگي فيلم کومبيناسييالاري کيمي   

  د. کامپیوتر انیمیشن

  بو هر قوروپون، اؤز ايچينه آلديغي تئخنيکالارين سايي، بوندان اؤنجه دئديگيميز کيمي سايا گلمزلر، آنجاق بير نئچه سي اوزره قيساجا اولاراق معلومات حاضيرلانميشدير. (آردینی اوخویون.)

   کماالدين بهزاد 

  ايرانين دونيا شؤهرتلي رسسامي، کماالدين بهزاد تخمينن 838 هئجري_شمسي ايلينده هرات_دا آنادان اولوب. بعضيلري نين دئديگينه گؤره اوشاقليقدا يئتيم قالديغي اوچون رسسام ميرک (خوراسانلي ميرک) اونو اؤز حیمایهسي آلتينا آليب، اؤز اؤيودلري ايله اونا يول گؤستريجيليک ائدر. بئهزاد بونونلا ياناشي ميرک_ين باخانليغي آلتيندا ایداره اولونان سولطان حسین کيتابخاناسيندان ايستيفاده ائدير، اورايا گليب گئدن صنعتچيلرله ياخين علاقه  قورا بيلير. بئهزاد او زامانلار نئچه مودت، اوستاد پير سيد احمد تبريزلي نظري آلتيندا رسسامليق اؤيره نير. او دؤور بئهزادين يوکسک رسسامليق ايستعدادي اوزه چيخير. او بئله کؤهنه رسسامليق قايدالاري ايله ده راضيلاشماييب اؤزونه مخصوص يئني قايدالار ايله رسملر چکير. بئهزادين بو يوکسک ايستعدادي هرات_ين بؤيوک باشلاري نين ديقتيني چکير.

انیمیشن کينوسونون مئيدانا گلمه نؤقطه سي 

  انیمیشن کينوسونون دا، جانلي فيلم (Live Action) کينوسونون دا وارليغي گؤرونوش ثابيتليگي (Persistence of Vision) قانونونا دايانسا دا، بو ايکي کينو طرزينده حرکتين قاورانيلماسيني ساغلايان چرچيوه لر سئريسي ايکي فرقلي يؤندمله الده ائديليرلر. عومومی آنلامدا آنيماسييانين ان تمل تئخنيک آلتلري ايز آلا بيله جک بير سطح و بو سطح اوزرينده ايز بيراخا بيله جک بير شئيدير. بو آلتلر ايله حاضيرلانان چرچيوه لر (frame) کامئرا واسيطه سي ايله لئنت اوزونه چکيليرلر. ليو آکشئن کينودا چرچيوه لر سئريسي، گئرچک نسنه لرين لئنت اوزونه چکيلمه سييله الده ائديلير.

  آنيماسييادا نسنه لرين فورماسي خط ايله يئنيدن بير سطح اوزرينده چکيلديگينده ايستر_ايسته مز، تصوير موجرردله مه سي باش وئره جک. گؤرونتولر واسيطه سييله قورولا بيله جک يئني بير حقيقت ياراتما يولوندا، آنيماسييا، ياراتما پروسئسي نين اساسي خطه سؤيکندگي اوچون جانلی فیلم کينوسوندان فرقليدير.