کماالدين بهزاد 

  ايرانين دونيا شؤهرتلي رسسامي، کماالدين بهزاد تخمينن 838 هئجري_شمسي ايلينده هرات_دا آنادان اولوب. بعضيلري نين دئديگينه گؤره اوشاقليقدا يئتيم قالديغي اوچون رسسام ميرک (خوراسانلي ميرک) اونو اؤز حیمایهسي آلتينا آليب، اؤز اؤيودلري ايله اونا يول گؤستريجيليک ائدر. بئهزاد بونونلا ياناشي ميرک_ين باخانليغي آلتيندا ایداره اولونان سولطان حسین کيتابخاناسيندان ايستيفاده ائدير، اورايا گليب گئدن صنعتچيلرله ياخين علاقه  قورا بيلير. بئهزاد او زامانلار نئچه مودت، اوستاد پير سيد احمد تبريزلي نظري آلتيندا رسسامليق اؤيره نير. او دؤور بئهزادين يوکسک رسسامليق ايستعدادي اوزه چيخير. او بئله کؤهنه رسسامليق قايدالاري ايله ده راضيلاشماييب اؤزونه مخصوص يئني قايدالار ايله رسملر چکير. بئهزادين بو يوکسک ايستعدادي هرات_ين بؤيوک باشلاري نين ديقتيني چکير.

  بئهزاد اؤز اوستادي ميرک واسيطه سي ايله ايلک اؤنجه سولطان حسين وزيري، عليشير نوايي، نئچه مودتدن سونرا ايسه سولطانين اؤزو خيتمتينه گيرير. بئهزاد, عليشير نوايي و سولطان طرفيندن آلقيشلانيب حيمايه اولونور و سولطان حسين طرفيندن  " ماني-يئ ساني "  (ايکينجي ماني) لقبيني آلير. بئهزادين اوستاليغي قيسا زامان ايچينده هامييا آيدينلاشير.

  بئهزاد سولطان حسين_نين صنعت سئور حوکومتي نين اؤزبکلر الي ايله ييخيلماسيندان سونرا دا شاه ايسماعيل_ين هراتا گلديگينه قدر اورادا قالير. بئهزاد گنج شاه ايله تبريزه کؤچوب، هرات_دان قاچان بير صنعتچي قوروپونون باشچيليغيني بوينونا آلاراق ايران رسسامليغيندا تبريز مکتبي نين تمه ليني قويور.

  شاه ايسماعيل_ين نه قدر بئهزادا حؤرمت بسله ديگيني اؤيرنمه یه، عوثمانيلر ایله چالديران موحاریبه سینده بئهزاد و اونلو  " خوشنويس " ، شاه ماحمود نئيشابورلونو امنييتلي بير ماغارادا گيزلنديریلمه لرینه امر ائتدیگي و ساواشدان سونرا هر شئيدن اؤنجه اوستادين حاليني سورماسي، سانيرام يئتر. شاه ايسماعيل بئهزادي 894 هئجري-يئ شمسي ايلينده ساراي کيتابخاناسي نين باشچيسي تعين ائدير. بو کيتابخانادا، کاتيبلر، رسساملار، مذهب_لر، قويومچولار (زرکوبلار) و باشقا صنعتچيلر چاليشيرديلار.

  بئهزاد عؤمرونون سون ايللريني شاه تهماسب ساراييندا، چوخ واختلار شاگيردلري نين ايشلريني دوزلتمکله کئچيريردي. قاسم علي، آغا ميرک، سلطان محمد، صاديق، مولانا مظفر علي، مير مصور و موللا يوسف، بئهزادين ان اونلو شاگيردلريندنديلر.

  هاميسي بئهزادينکي ساييلا بيلينمز چوخلو بئهزاد آدي ايله ايمضالانميش اثر وار. آنجاق سلطان حسين بايقيرانين پورتره سي، سلطان حسين آتا مينميشکن، قانداللي (زينجيرلي) آسلان، آسلان ايله جئيران و باشقالاري اوستاددان قالان اثرلردير.

  اوستاد بئهزاد 912 ه.ش._ده تبريزده بو دونيادان کؤچور و بو شهرده، شيخ کمال خجندي نين مقبره سي يانيندا تورپاغا وئريلير.

  بونو دا دئمه ليگيک کي بعضي قايناقلارا گؤره بئهزاد 854 ه.ش._ده دوغولوب 942 ه.ش._ده ده تبريزده حياتيني دگيشميشدير.

  بئهزاد ثمرلي عؤمرونون 20 ايليني بلکه ده بوندان آرتيغيني تبريزده کئچيردي. تبريزين، او عصرين گؤرکملي اوستالاريني قوينينا آلماسي ايله موغول و آغ قويونلولاردان قالميش پارلاق کئميشي تبريز تاريخي نين ان ثمرلي دؤورلريندن بيريني مئيدانا گتيرميشدي. تبريز, کؤنلونون قاپيسيني بئهزادين اوزونه آچيب اونون صنعتيندن فایدالاناراق ايران و شرق رسسامليغي نين ان اؤنملي مکتبلريندن بيريني اؤز آدينا قازانديرير. [1]

  [1] قايناق:  "  سیر تطور هنر در آذربايجان (آذربايجاندا اینجه صنعت اينکيشافي) "  کيتابيندان؛ يازار: روح الله عباس خالقي؛ سوروش نشريياتي؛ تئهران؛ 2004/1385 - انيمارال_دا تورکجه يه چئوريلدي، 2007