نهنگ قانادلي چوخ ياشلي قوجا   

قابريئل قارسييا مارکئس 

  ياغيشين اوچونجو گونونده ائوين ايچينده او قدر يئنگج (خرچنگ) اؤلدورموشدولر کي پئلايو سويلا دولموش حَيَطلريندن کئچيب اونلاري دنيزه آتمالي اولدو، چونکي يئني دوغولموش کؤرپه لري بوتون گئجه ني قيزديرما ايچينده ايدي، و  " بو عوفونتدندير "  دئيه دوشونوردولر. دونيا چرشنبه آخشاميندان بري کدرلي ايدي. گؤيله دنيز بيرجه آلاتوران شئيه چئوريلميشدي و قومو مارت گئجه لري قور-قور پارلايان ساحيل، پؤرتموش پالچيق و چوروموش صدف ساحيلينه دؤنموشدو. گون اورتا واختي، پئلايو يئنگجلري دنيزه آتيب ائوه قاييداندا هاوا او قدر توتقونويدو کي دال حيطده ترپه نيب اينيلدييه نين نه اولدوغونو سئچمک مومکون دئييلدي. اونون قوجا بير کيشي، چوخ قوجا بيريسي اولدوغونو آنجاق لاپ ياخينينا گئتديگينده سئچه بيلميشدي. اوزوقويلو پالچيغا اوزانميشدي. نه قدر چابالاييرديسا قالخا بيلميردي؛ نهنگ قانادلاري مانع اولوردو. 

  آردينی اوخویون.

  دهشتلي قاراباسمادان (کابوسدان) سارسيلميش پئلايو، خسته کؤرپه لريندن بير آن بئله آيريلمايان آروادي، ائليسئندايا دوغرو قاچيب اونو دال حيطه آپاردي. ايکيسي ده، دونوب لال-دينمزجه، پالچيغا باتميش ياراتيغا باخديلار. جينديرياغانلار کيمي گئيينميشدي، داز کلله سينده تک-توک سولغون توک قالميشدي و آغزيندا ايسه بير نئچه دنه ديش. جومجولاق ايسلانميش قوجانين آجيناجاقلي وضعيتي، اونا گرک اولان عظمتي تاماميله سيماسيندان سيلميشدي. سار قوشونا بنزر کيرلي و ديديک قانادلاري سانکي ابديليک پالچيغا باتيب قالميشدي. پئلايو و ائليسئندا اوزون مودت خئيلي ديقتله اونا باخديلار و تئزليکله هيجانلارينا اوستون گلديلر، حتّی اونونلا ياخينليق دويوب دانيشماغا اورک ائله ديلر، او ايسه دنيزچيلره خاص اولان قالين بير سس و آنلاشيلماز بير لهجه ايله ديللندي. بئله ليکله  " او سادجه قاسيرغانين داغيتديغي خاريجي بير گمي نين يئگانه قورتارميشيدير "  دئيه عاغيلليجا مساله يه سون قويوب قانادلار مساله سيندن ایسه يان کئچديلر. هله اونو گؤرمک اوچون اؤلوم-ديريم حاقيندا هر شئيي بيلن قونشو قاديني دا چاغيرديلار و اونلارا يانيلديقلاريني باشا سالماق اوچون قادينا اؤتري بير باخيش دا يئترليدي. 

   " او بير ملکدير " ، قادين اونلارا دئدي.  " کؤرپه اوچون گلميش اولماليدير، آنجاق زاواللي کيشي او قدر قوجادير کي ياغيش اونو يئره ساليب " . 

  ائرته سي گون هامي گئرچک بير ملگين پئلايوگيلده اسير دوشدويوندن خبردار اولموشدو. عاغيللي قونشو قادينين، بو زامانه ملکلرينين، سماوي بير تؤطيعه دن ياخا قورتاريب قاچديقلاري باره ده چيخارديغي حؤکمونه باخماياراق اونو اؤلومونه دؤيمک اورگي اونلاردا يوخ ايدي. پئلايو بوتون آخشامي مطبخدن اونا گؤز قويموشدو، ياتاغا گيرمزدن اول محکمه چوماغيني يانينا آليب اونا گئتدي، پالچيقدان چيخاريب تويوقلار قفسينه قاتيب باغلادي. گئجه ياريسي، ياغيش کسميشکن، پئلايو و ائليسئندا هله يئنگج اؤلدوروردولر. بيراز کئچميش کؤرپه لري، قيزديرماسي تاماميله کسيلميش بير حالدا، يئمک هوسي ایله اوياندي. کؤنوللري آچيليب قرارا آلديلار کي ملگي تزه سو و اوچ گونلوک يئمکله برابر بير سالا مينديريب انگين دنيزلرده اؤز طالعينه بوراخسينلار. آنجاق دان يئري سؤکولورکن حَيَطه چيخديقلاريندا بوتون قاپي-قونشونو قفه سين اؤنونه ييغيشيب ملگي اؤزلرينه اَيلنجه قيلميشکن گؤردولر، حياسيزجاسينا قفس دئشيکلريندن اونا يئمک اوچون شئي-شوي توللاييرديلار، سانکي او فؤوق العاده بير ياراتيق يوخ، بير سيرک حئيوانييميش.

  کئشيش قونزاقا غريبه  خبري ائشيديب ساعات يئدديدن قاباق اؤزونو چاتديردي. يئنيجه اورايا گلميش تاماشاچيلار سحرکيلره گؤره داها آز يونگوللوک چيخاريرديلار و اسيرين گله جگي اوزره هرنه دئسن گومانلار ايره لي سوردوروردولر. اونلارين ان ساده لؤوحو  " او دونيانين آغاسي اولماليدير "  دئيه دوشونوردو. سرت دوشونجه لي بير داهاسي نين فيکرينجه اونا، بوتون دؤيوشلري قازانماق اوچون بئش اولدوزلو گئنئرال روتبه سي وئرمه لييميشلر. بعضي خيال سئورلر ايسه آرزو ائتديلر کي کايیناتين يوکونو بوينونا گؤتوره بیله جک بيريسينی سئچمک اوچون کاش دونيانين بوتون مودريک قانادلي کيشيلري آراسيندا بير ياريش کئچيريليدي و اونو دا بو ياريشدا ايشتيراک ائتديررديلر. آما کئشیش قونزاقا هله کئشيش اولماميشدان قاباق ساغلام بير مئشه قيران ايدي. قفسين يانيندا دورموشکن ديني گؤستريشلري بير آندا يادداشيندان کئچيريب، قورخموش جوجه لر ايچينده داها چوخ الدن دوشموش نهنگ بير تويوغا بنزه ين بو زاواللي کيشييه ياخيندان نظر سالماق اوچون قفسين قاپيسينين آچيلماسيني خواهيش ائتدي. زاواللي ملک قفسين بير بوجاغينا قيسيليب، ائرکندن گلن زيارتچيلرين توللاديغي مئيوه قابيقلاري و سحر يئمگي قاليقلاري آراسيندا اوزانيب گون قاباغينا سرميش قانادلاريني قورودوردو. کئشيش قونزاقا قفسه گيريب، اونا لاتينجه  " صاباحينيز خئير اولسون "  دئينده، بوتون دونيايا ياد اولان بير حؤرمتسيزليکله سادجه آنتيکوار گؤزلريني قالديريب اؤز لهجه سيله نسه ميريلداندي. دايره کئشيشي، اونون تانري ديليني آنلاماديغيني يا ان آزيندان تانري خيدمتچيسيني نئجه سالاملاماغيني بئله بيلمه ديگيني گؤردويونده، اونون فيريلداقچي بيريسي اولدوغونا شوبهه لنمه يه باشلادي. سونرا جاماعاتا چاتديردي کي ياخيندان (ملک يوخ) داها چوخ بير اينسان گؤردو: دؤزولمز بير قوخوسو وار، قانادلاري نين دالي پارازيت[1] سپيب، قانادلاريني يئر قاسيرغاسي ديديشديريب و اوندا ملکلرين غورورلو اردمينه اويغون گله جک بير شئيدن هئچ اثر-علامت يوخدور. سونرا قفسدن چيخيب قيسا بير موعيظه ايله هر گليب-کئچنله ماراقلانانلارا سادلؤوحلوگون تهلوکه لري باره ده خبردارليق ائتدي. خاطيرلاتدي کي کارناوال مکري بئزه ييب احتياطسيز اينسانلاري گيجلتمک ايبليسين يامان ورديشلريندن بيريدير. دئدي کي اگر قاناد، قيرغي ايله طياره ني بير-بيريندن آييرد ائتمک اوچون اساس ائلئمئنت ساييلميرسا، دئمه لي ملکلري تانيماق اوچون داها دا آز اؤنم داشييير. آنجاق يئپيسکوپونا (اسقف) مکتوب يازاجاغينا سؤز وئردي تا کي باش يئپيسکوپا (اسقف اعظم) و سونرا ايسه روما پاپاسينا، عالي محکمه نين سون قراريني آلماق اوچون چاتديريلسين.

  اونون احتياطليغي ايراده سيز کؤنوللره ايشله دي. اسير ملگين خبري او قدر سورعتله ياييلدي کي حَيَط بير نئچه ساعات ايچينده بازار چاخناشماسينا چئوريلدي و آز قالا ائوي ييخان جاماعاتي, داغيتماق اوچون سونگولو پوليس چاغيراسي اولدولار. آرتيق ائليسئندانين بئلي او بويدا زير-زيبيل ييغماقدان آغريماغا باشلاميشدي، بيردن عاغلينا گلدي کي حَيَطه حاصار چکيب، گيريش حاقي اولاراق مله يه تاماشا ائتمک ايسته ينلردن بئش سئنت آلسينلار.

  خئيلي اوزاقلاردان ماراقلانميش اينسانلار گليب چيخديلار. اورايا گلميش سيار بير کارناوالين اوچان کنديربازي دفعه لرجه قالاباليغين اوزريندن اوغولداياراق اوچدو، آنجاق کيمسه نين ماراغيني قازانا بيلمه دي، چونکي قانادلاري، ملکلرينکيندنسه داها چوخ ياراسانينکينا اوخشاييردي. دونيانين ان بدبخت عليللري شفا اوغروندا اورايا گلميشديلر: اوشاقليغيندان بري اورک دؤيونتوسونو سايان و ساييني الدن چيخاران کاسيب بير قادين؛ اولدوزلار سسيندن يوخوسو عرشه چيخان پورتوقالييالي بير کيشي: اوياق ايکن دوزلتديگي هر شئيي گئجه لر خارابلايان يوخوگزن بير کيشي؛ و آز تهلوکه لي خسته ليگي اولان خئيلي باشقا اينسانلار. دونيايا سس سالان او حاديثه نين قؤوغاسي اثناسيندا پئلايو و ائليسئندا هم يورغون هم ده سئوينجک ايديلر چونکي بير هفته دن آز بير مودت ايچينده اوتاقلاريني آغزيناجان پول ايله دولدورموشدولار و هله ايچري گيرمک اوچون اونلارين ايجازه سيني گودن زووارلارين سيراسي ايسه اوفوقه جن اوزانميشدي.

  بو اويونا قاتيلمايان يئگانه شخص ملک، يني باش رولون اؤزويدو. قفسه ياخين دوزولموش نئفت فانارلاري و موقدس شاملارين يايديغي جهننم حرارتيندن بيخميش ملک آنجاق بوتون واختيني چابالاييب چاليشيردي کي بلکه موقتي يوواسيندا راحاتليق دويسون.  " نافتالين ملکلرين يازيلميش خوصوصي يئمگيدير "  دئيه عاغيللي قادينين وئرديگي عاغيلينا گؤره، اؤنجه اونا نافتالين يئديرمه يه چاليشديلار. آنجاق اونلاري دا، تؤوبه کارلارين گتيرديگي موقدس يئمگي ده گئري قايتاردي. آخيردا باشا دوشمه ديلر کي ملک اولدوغونا گؤره مي يوخسا عؤمرونون سونلاريندا باديمجاندان باشقا هئچنه يئيه بيلمه ديگي قوجاليغينا گؤره بو ايشي گؤردو. ائله نظره گليردي کي اونون بيرجه فؤوقلاده ليگي دؤزوملولوگودور. خوصوصيله ده ايلک گونلرده؛ تويوقلار، قانادلاريندا ياييلميش اولدوزا بنزر پارازيتلري دنله مک اوچون اونو ديمديکله ينده، عليللر شفا آرزوسو ايله بدنلري نين خسته و ايشدن دوشموش يئرلرينه سورتمک اوچون قانادلاريني يولاندا و زووارلارين، اونو آياق اوسته گؤره بيلمک اوچون داشلاماقلا قالديرماق ايسترکن ان تمکينلي و ساکيت داورانيشيندا بو دؤزوملولوک آشکارجاسينا اوز گؤستريردي. يالنيز بيرجه دفعه ، دامغا وورانلا بؤيرونه داغ باساندا اونو يئريندن اويناتماغي باجارديلار. چونکي اوزون مودت حرکتسيز قالديغينا گؤره،  " آرتيق اولوب "  دئيه سانميشديلار. بيردن داشلانيب يئريندن ديکسيندي، گؤزلري ياشاريب ديکباش لهجه سيله دئيينه رک بير نئچه دفعه  قاناد چاليب تويوقلارين ايفراضاتيني و توز-تورپاغي گؤيه سوووردو، ائله بير واهيمه لي فيرتينا قوپدو کي سانکي هئچ بو دونيايا عایيد دئييلدي. چوخلاري، بو داورانيش غضبدن دئييل آغريداندير دئيه دوشونسه لر ده او آندان اونو بير داها اينجيتمکدن چکينمه يه باشلاديلار، چونکي چوخلاري باشا دوشدولر کي اونون بو ساکيتليگي، قوجالميش بير قوچاغين ساکيتليگي دئييل، بير فيرتينا اؤنجه سي ساکيتليگيدير.

  اسيرين طبيعتي حاقيندا سون حؤکمو گؤزله مکده اولان کئشيش قونزاقا، خيدمتچي بير قادينين وئرديگي ايلهام سايه سينده ايزديحامين بئزه ديگي اويونلارين قارشيسيني آليردي. آنجاق رومادان گلن مکتوب تلسمه يه گرک گؤرموردو. يوخاريداکيلار واختلاريني بونلاري اؤيرنمه يه صرف ائتميشديلر: دوستاغين گؤبگي وارمي، لهجه سي ايله آرامي ديلي نين اوخشارليغي وارمي، نه مودته دک سانجاق اوجوندا اوتورا بيلير ياخود او سادجه قانادلي بير نروژلي دئييلمي؟ اولا بيلسين کي ايلاهي بير حاديثه  کئشيشين بو راحاتسيزليغينا سون قويماسايدي بو يارارسيز مکتوبلارين وار-گلي قييامت قوپانادک ده سوردورولمکده اولاجاقدي.

  او گونلرده، جاذيبه لي خئيلي سيرکلر ايله ياناشي، آتا-آناسي سؤزونه باخماديغي اوچون بير هؤرومچه يه (تورآتان) دؤنموش قادي نين سيار سيرکي ده شهره گلميشدي. اونون سيرکي نين هم گيريش حاقيسي ملگينکيندن داها اوجوزويدو هم ده اوسته ليک، جاماعاتا، بو غريبه  چئوريلمه حاقيندا اونا ايسته نيلن سورغونو وئرمه يه و گئرچک بير چئوريلمه اولوغوندا هئچ شوبهه قالماسين دئيه قاديني هر طرفدن سيناماغا ايجازه وئريلميشدي. او کدرلي گنج قيز گؤرکملي، قوچ بويدا قورخولو بير بؤو (رتیل) ايدي. آما ان اورک_سيزلادان شئي، اونون عئيبجر گؤرکمي دئييل، اوغورسوز طالعيني بوتون تفصيلات  ایله ناغيل ائديرکن درين کدري ايدي. هله اوشاق ايکن، بير گئجه گيزليجه آتاسي ائويندن چيخيب رقصه گئدير، بوتون گئجه ني ايجازه سيز اولاراق رقص ائديب مئشه ليک يولو ايله ائوه قاييداندا، بيردن سماء دهشتلي بير گورولتو ايله ياريلير و ياريغين آراسيندان گؤز_قاماشديريجي کوکورد ايلديريمي اونا ووروب هؤرومچه يه دؤندرير. اونون بيرجه يئمگي ات پارچالاري ايدي کي اونو دا رحملي اينسانلار آغزينا آتيرديلار. اؤلوملولر ایله (اسنسانلار ایله) يوووشمايان تکببورلو ملگين گؤستريسي، اونسوز دا، اينساني حقيقتلر و آجي عيبرتلرله دولو بو گئرچک حاديثه  نين اوزوندن قاپانيلماغا محکوم قيلينميشدي. هم ده مله يه عایيد ائديلن بير نئچه مؤجيزه ده بير نؤوع روحي چاتيشمازليغي آشکارا چيخاردي؛ کور آدامين گؤزلري نين آچيلماسي يئرينه اوچ يئني ديش چيخارماسي، ياخود ايفليج بير خسته نين آياقلاري نين آچيلماماسي آنجاق لاتئرئي_ني آز قالا اودماسي و جوزام خسته سي نين يارالاريندان گونه_باخانلارين چيچکلنمه سي کيمي داها چوخ مضحکه يه بنزه ين مؤجيزه لري، اونون شؤهرتيني محو ائتمکده ايدي، آنجاق هؤرومچه يه دؤنموش قادينين گليشي اونو تاماميله آبيردان سالدي. بله ليکله کئشیش قونزاقا بيريوللوق يوخوسوزلوقدان ياخا قورتاردي و پئلايوگيلين حَيَطلري يئنيدن، او اوچ_گونلوک آراسيز ياغيشلي و يئنگجلرين ياتاق اورتاسيناجان وار-گل ائتديگي گونلر کيمي ساکيتلشدي.

  آنجاق ائو يييه لري گيلئيلنمک اوچون هئچنه سبب گؤرموردولر. ييغديغي پوللار ايله، بالکونلو، باغچالي، قيشلاري يئنگجلرين آشا بيلمه يه جگي اوجا ديوارلي ايکي_مرتبه لي بؤيوک بير ائو تيکديرديلر و ملکلر ايچري گيره بيلمه سين دئيه پنجره لره دمير بارماقليقلار قوشدولار. همچينين پئلايو شهره ياخين دووشان دامي تيکديريب محکمه کؤمکچيسي اولاراق ايشيندن ده بير_يوللوق چيخدي. ائليسئندا ايسه آطلاس دون، ديکدابان آياققابيلار و او زامانلار بازار گونلري آدلي-سانلي خانيملارين گئيديگي الوان ايپکدن خئيلی باشقا پالتارلار آلدي.

  باخيمسيز قالان تک شئي يالنيز تويوقلار هيني ايدي. تئز-تئز قفسي کاربول ایله يويوب ايچينده عود يانديريرديلارسا مله يه بسله ديگي حؤرمته گؤره دئييل بير قاراباسما کيمي هله ده هر يئره ياخيلميش و تزه ائوي کؤهنه بيريسي کيمي گؤسترن ايفراضات قاليقلاريني و عوفونتي تاماميله آرادان قالديرماق اوچون ايدي. کؤرپه لري نين آياق آچديغي ايلک گونلرده اونو قفسه ياخين دوشمه يه قويموردولار. آنجاق بالا-بالا اييه آليشيب قورخونو اونوتدولار و سود ديشلريني تؤکنه کيمي قفس تورونون آرالي يئرلريندن ايچري گيريب اويناماق اوشاقلاري نين هميشه ليک اويونونا چئوريلميشدي. ملک باشقا اؤلوملولر کيمي اونونلا دا آز يوووشوردو. آنجاق اوشاغين بيله رکدن ائتديگي روسوايچيليقلارينا دؤزوملو بير کؤپک تکي دؤزوردو. اونلارين ايکيسي ده عئيني زاماندا سوچيچگي چيخارديلار. اوشاغا باخان حکيم مله يه ده باخماق ماراغيندان اؤزونو ساخلايا بيلمه ييب اورک دؤيونتوسونه قولاق آساندا ائله فيت سسلري و بؤيرگيندن ايسه ائله عجاييب سسلر ائشيتدي کي اونون نئجه ديري قالديغينا چاشباش قالميشدي. آنجاق اونو ان چوخ چاشديران قانادلارين نئجه بيتمه سي ايدي. چونکي اونلار او اينساني ووجوددا او قدر طبيعيديلر کي هئچ باشا دوشموردو نييه باشقا اينسانلار دا اونون کيمي قانادلي دئييللر.

  اوشاقلاري مکتب ياشينا چاتديغيندا آرتيق ياغيشلا گونش قفسي تاماميله داغيتميشدي. ملک، اؤلوم اوزره اولان باخيمسيز بير کيشي کيمي هئي اؤزونو اويان-بويانا چکيشديريردي. اونو سوپورگه ايله ياتاقدان قوووردولارسا بير دقيقه  کئچمز مطبخده گؤروردولر. سانکي عئيني زاماندا بير نئچه يئرده دير، ائله اولدو کي  " او ايکي_له شيب اؤزونو تکثير ائديب و بوتون ائوه ياييبدير "  دئيه شوبهه لنمه يه بئله باشلاديلار و حيرصله نيب اوسانميش ائليسئندا  " بو ملکلرله دولو جهننمده ياشاماقدان بئزديم آرتيق "  دئيه قيشقيردي. ملکسه آرتيق گوجله يئمک يئيه بيليردي و گؤزلري نين ايشيغي او قدر آزالميشدي کي يئريينده اويان-بويانا ايليشيردي. گئرييه قالانلارسا سادجه بير نئچه کؤورک و چيلپاق له_لک (تئلک) ايدي. پئلايو مرحمتلي بير داورانيشلا اونو ياتماق اوچون آنبارا بوراخيب اوستونه ده بير اديال (پتو) چکدي، ملگين، او گئجه قيزديرما ايچينده اولدوغونو يالنيز اوندا باشا دوشدولر، ساييقلاييب اسکي نروژ ديلينده نسه ميريلدانيردي. ائله بير حالدايدي کي اؤله جک دئيه دوشوندولر و اؤلو بير ملک ایله نئيليه جکلريني عاغيللي قونشو قادين دا بئله بيلميردي.

  آنجاق او ان سرت قيشيني باشا ووردو کي هئچ، هله ايلين ايلک گونشلي گونلريندن ساغالماغا دا باشلادي. حَيَطين، کيمسه گؤره بيلميه جگي لاپ ديب_بوجاغيندا گيزله نيب گونلر بويونجا اوردا قالدي، دئکابرين اوللريندن قانادلاريندا ايري و مؤحکم له_لکلر بيتمه يه باشلادي؛ داها چوخ قوجاليغين باشقا بير اوغورسوزلوغونو آنديران بير اويوق (مترسک) له_لکلرينه بنزر له_لکلر. يقين کي بو دييشيکليگين سببيني اؤزو بيليردي، چونکي بعضي اولدوزلو گئجه لري زومزومه ائتديگي دنيز ماهنيلاري نين ائشيديلمه سيني ايستمه ديگي کيمي گؤزتله ييردي کي کيمسه بو دييشيکليگي سئزمه سين. بير گون سحر، ائليسئندا ناهار يئمگي اوچون سوغان دوغراييرکن انگين دنيزلردن اسن کيمي بير کولک بيردن مطبخين ايچينه باسدي. پنجره يه دوغرو گئتديگينده بيرينجي دفعه  اولاراق ملگي اوچماغا چاليشيرکن گؤردو. او قدر باجاريقسيز قاناد چاليردي کي اؤزونو هاوادا ساخلايا بيلمه ييب گونش شوعاعلاري آراسيندان سوروشوب دوشوردو، يؤندمسيز ايشله ديگي اوزوندن بوتون تره_وز کرديلريني آلت-اوست ائتدي و آز قالا آنباري دا بئله اوچورسون. آنجاق آخيردا يئردن قوپماغي باجاردي. ائليسئندا اونون، قوجا بير لئش_يئين کيمي اؤزونو بير تهر گؤيده ساخلاييب سونونجو ائولري ده گئريده بوراخديغيني گؤرنده اؤزو و اونون اوچون توختاقليق دويوب دريندن نفسيني دردي. حتّی سوغان دوغرارکن ده اونو سئير ائديردي و تاماميله سماءدا گؤزدن ايتمه ينه دک گؤزونو اوندان چکمه دي، چونکي آرتيق او ائليسئندانين حياتيندا بير يوک دئييل، دنيزين اوفوقونده خيالي بير نؤقته ايدي.

  آچار سؤزلر: دونيا ادبياتي، گابریل گارسيا مارکز، سئحیرلي رئاليزم، نهنگ قانادلي چوخ ياشلي قوجا، "پیرمرد فرتوت با بالهای عظیم" 

  آنيمارال يازيلاريندان ايستيفاده ائتمک آنجاق قايناغي قئيد اولونورسا سربستدير.

اورژینال قایناق (لاتین الیفبادا): http://www.animaral.com/modules.php?name=News&file=article&sid=76

اينگيليزجه يه ترجومه سيندن چئوريلدي، اينگيليزجه واريانتي: